ცნობილია 18 წლის გოგონას ვინაობა, რომელიც ნასვამმა მძღოლმა იმსხვერპლა - ავტოსაგზაო შემთხვევის დეტალები
გუშინ, ღამის საათებში გარდაბანში ავარია მოხდა, რასაც 18 წლის გოგონას სიცოცხლე ემსხვერპლა. შსს-ის ინფორმაციით, დააკავეს პირი, რომელიც გარდაბნის მუნიციპალიტეტში, არაფხიზელ მდგომარეობაში, მსუბუქი ავტომობილით ქვეითად მოსიარულეს შეეჯახა.
- გარდაცვლილი ახალგაზრდა 18 წლის აიდა კურბანოვაა.
"დიდი ტრაგედია მოხდა, მთელი გარდაბანი ტირის. მაღაზიაში მუშაობდა აიდა. ძალიან ლამაზი, ყურადღებიანი და კარგი გოგონა იყო. საუბარიც მიჭირს, იმდენად მძიმე ამბავია. ერთადერთი, რისი თქმაც შემიძლია, ისაა, რომ ეს არ არის პირველი შემთხვევა გარდაბანში... არც მოძრაობის ნიშნები და არც საპატრულო ეკიპაჟი არ არის არასდროს ამ ადგილას, რომ რამე რეგულაციები იყოს! ერთი შუქნიშანია და რა ფუნქცია აქვს, არ ვიცი" - გვიყვებიან ადგილობრივები.
შინაგან საქმეთა სამინისტროს ცნობით, სამართალდამცველებმა ავტოსაგზაო შემთხვევაში ბრალდებული მძღოლი ცხელ კვალზე დააკავეს.
"შინაგან საქმეთა სამინისტროს, ქვემო ქართლის პოლიციის დეპარტამენტის გარდაბნის რაიონული სამმართველოს თანამშრომლებმა, ტრანსპორტის მოძრაობის უსაფრთხოების წესის დარღვევის ბრალდებით, რამაც ადამიანის სიცოცხლის მოსპობა გამოიწვია - 1992 წელს დაბადებული მ.მ. დააკავეს.
გამოძიებით დადგინდა, რომ მიმდინარე წლის 27 იანვარს, გარდაბნის მუნიციპალიტეტში, მთვრალ მდგომარეობაში მყოფი ბრალდებული მსუბუქი ავტომობილით შეეჯახა ქვეითად მოსიარულე - 2007 წელს დაბადებულ ა.კ.-ს. მიღებული დაზიანებების შედეგად ა.კ. შემთხვევის ადგილზევე გარდაიცვალა.
სამართალდამცველებმა ავტოსაგზაო შემთხვევაში ბრალდებული მძღოლი ცხელ კვალზე დააკავეს.
გამოძიება სისხლის სამართლის კოდექსის 276-ე მუხლის მე-6 ნაწილით მიმდინარეობს, რაც 7 წლამდე ვადით თავისუფლების აღკვეთას ითვალისწინებს“, - აღნიშნულია შსს-ს ინფორმაციაში.
